غلام نبي ڀنگر

ڀنگر، غلام نبي: سماج سڌارڪ غلام نبي ڀنگر 1916ع ڌاري جيڪب آباد کان پنج ميل اوڀر طرف ڳوٺ متي ڀنگر ۾ جنم ورتو. پرائمري تعليم ڳوٺ ”زنگي پور“ مان حاصل ڪيائين. 1936ع ۾ سنڌ مدرسة الاسلام ڪراچيءَ مان مئٽرڪ ڪيائين. ان کان پوءِ ڊي. جي سائنس ڪاليج ڪراچيءَ مان 1940ع ۾ بي. اي ڪري وڌيڪ تعليم حاصل ڪرڻ لاءِ مسلم يونيورسٽي عليڳڙهه ويو، جتان 1942ع ۾ ايم. اي ۽ ايل. ايل. بي جون سندون حاصل ڪري واپس موٽيو. عملي زندگيءَ جو آغاز ’جيالاجيڪل سروي آف انڊيا‘ جي محڪمي ۾ بحيثيت اسٽور ڪيپر ڪيائين. ڏھن مھينن تائين بلوچستان جي مختلف علائقن ۾ رھيو. 1943ع کان 1947ع تائين مسلم لا ڪاليج ڪراچيءَ ۾ ليڪچرار مقرر ٿيو. 1947ع جي آخري چئن مھينن ۾ حڪومت سنڌ جي محڪمي سيلز اينڊ ٽيڪسيشن ۾ آفيس سپرنٽينڊنٽ طور خدمتون انجام ڏنائين. 1948ع کان 1957ع تائين جيڪب آباد ۾ وڪالت جي پيشي سان وابسته رھيو. پاڻ گورنمينٽ ڊگري ڪاليج جيڪب آباد جو پرنسپال ۽ باني ڪارڪنن مان ھڪ ھو. 1959ع کان 1960ع تائين ميرپورخاص ۾ وڪالت ڪيائين. 1961ع کان 1962ع تائين سٽي آرٽس ڪاليج حيدرآباد ۾ پرنسپال جي عھدي تي رھيو. 1963ع کان 1968ع تائين سنڌ يونيورسٽيءَ ۾ انسپيڪٽر آفَ ڪاليجز مقرر ٿيو، جتي ھن سوشل ورڪ جو شعبو قائم ڪيو ۽ شعبي جو چيئرمئن پڻ رھيو. 1969ع کان 1972ع تائين سنڌ يونيورسٽيءَ ڄامشوري ۾ رجسٽرار مقرر ٿيو ۽ پوءِ مئي 1972ع ۾ استعيفيٰ ڏنائين. هن ڀنگر فائونڊيشن جو بنياد پڻ وڌو. غلام نبي ڀنگر، 17 اپريل 2010ع تي وفات ڪئي.

داخلا ۾ استعمال ٿيل تاريخون

1916.00.00  عيسوي

غلام نبي ڀنگر 1916ع ڌاري جيڪب آباد کان پنج ميل اوڀر طرف ڳوٺ متي ڀنگر ۾ جنم ورتو

2010.04.17  عيسوي

غلام نبي ڀنگر ، 17 اپريل 2010ع تي وفات ڪئي

شخصيتون - ڀاڱي جون ٻِيون داخلائون